សមត្ថកិច្ចចុះបង្ក្រាប និងបោសសំអាតទីតាំងឆបោកអនឡាញធំៗ ២កន្លែងនៅក្រុងប៉ោយប៉ែត ឃាត់ខ្លួនមនុស្សជាង ៤០០នាក់

អនុវត្តតាមបទបញ្ជារបស់ ឯកឧត្តម នាយឧត្តមសេនីយ៍ ស ថេត អគ្គស្នងការនគរបាលជាតិ និងដោយមានការសម្របសម្រួលពីតំណាងអយ្យការអមសាលាដំបូងខេត្តបន្ទាយមានជ័យ នៅថ្ងៃទី២២ ខែមេសា ឆ្នាំ២០២៦ ឯកឧត្តម ឧត្តមសេនីយ៍ឯក ហែម សុវត្ថិ បានដឹកនាំកម្លាំងចម្រុះចុះបង្ក្រាបទីតាំងលួចលាក់ប្រព្រឹត្តបទល្មើសឆបោកអនឡាញចំនួន ២ទីតាំង (ស្មើនឹង ៣អគារ) ស្ថិតក្នុងសង្កាត់អូរជ្រៅ ក្រុងប៉ោយប៉ែត។

នៅក្នុងប្រតិបត្តិការនោះ រកឃើញមនុស្សសរុប ៤០២នាក់ (ស្រី ៣៦នាក់) មាន ១០សញ្ជាតិផ្សេងៗគ្នា មាន ចិន វៀតណាម បង់ក្លាដេស ប៉ាគីស្ថាន ឥណ្ឌូនេស៊ី មីយ៉ាន់ម៉ា ជីគីស្ថាន ឥណ្ឌា នេប៉ាល់ និងហ្សកហ្សី។ ដោយឡែកវត្ថុតាងដែលប្រមូលដកហូតបានមានដូចជា កុំព្យូទ័រយួរដៃ និង លើតុ ៦៣១គ្រឿង, ទូរស័ព្ទដៃ ២,៤៣២គ្រឿង, រថយន្ត ៧គ្រឿង, អាវុធខ្លី ១ដើម (គ្រាប់ ១០គ្រាប់) និងប្រាក់សុទ្ធជិត ១ម៉ឺនដុល្លារ រួមនឹងឯកសារមួយចំនួនទៀត។

ជនបរទេសដែលឃាត់ខ្លួនបានចំនួន ៣៨៥នាក់ ត្រូវបានបញ្ជូនទៅអគ្គនាយកដ្ឋានអន្តោប្រវេសន៍ រីឯជនសង្ស័យជាមេខ្លោង និងអ្នកគ្រប់គ្រង ១៧នាក់ (ចិន ១៤នាក់ និងខ្មែរ ៣នាក់) ត្រូវបានបញ្ជូនទៅនាយកដ្ឋានប្រឆាំងបទល្មើសល្បែងពាណិជ្ជកម្ម។

ក្រុមសង្ស័យបានប្រើប្រាស់បណ្តាញសង្គម (FB, Instagram, Telegram, WhatsApp) ដើម្បីធ្វើសកម្មភាព៖
១. អូសទាញឱ្យវិនិយោគរូបិយបណ្ណ និងភាគហ៊ុនក្លែងក្លាយតាមរយៈវេបសាយ http:crypto.com។
២. ឆបោកប្រាក់តាមប្រព័ន្ធ Crypto Currency។
៣. ប្រើរូបភាពលួងលោមស្នេហា (Romance Scam) ដើម្បីបោកបញ្ឆោតជនរងគ្រោះឱ្យវិនិយោគ។

គោលដៅនៃការឆបោករបស់ក្រុមនេះ គឺសំដៅទៅលើជនរងគ្រោះនៅតំបន់ អឺរ៉ុប និងសហរដ្ឋអាមេរិក។ បច្ចុប្បន្ន ទីតាំងទាំងពីរត្រូវបានសមត្ថកិច្ចសម្រេចបិទសៀលជាបណ្តោះអាសន្ន ដើម្បីបន្តនីតិវិធីច្បាប់៕