កងការពារព្រំដែនលេខ៥០៣ រៀបចំប្រជុំបូកសរុបលទ្ធផលការងារយោធាសន្តិសុខ ឆ្នាំ២០២៤ និងផ្សព្វផ្សាយផែនការសកម្មភាពការងារឆ្នាំ២០២៥

បន្ទាយមានជ័យ ថ្ងៃទី២៧ ខែមីនា ឆ្នាំ២០២៥ នៅទីបញ្ជាការ កងការពារព្រំដែនលេខ៥០៣ បានរៀបចំកិច្ចប្រជុំបូកសរុបលទ្ធផលការងារយោធាសន្តិសុខ ឆ្នាំ២០២៤ និងលើកទិសដៅអនុវត្តការងារឆ្នាំ២០២៥ ដែលពិធីនេះស្ថិតក្រោមអធិបតីភាព ឧត្តមសេនីយ៍ទោ ឈុន ម៉ៅ មេបញ្ជាការរងយោធភូមិភាគទី៥ មេបញ្ជាការទិសទី១ បន្ទាយមានជ័យ។

អញ្ជើញមានមតិសំណេះសំណាល នាឱកាសនេះ ឧត្តមសេនីយ៍ទោ ឈុន ម៉ៅ បានថ្លែងកោតសរសើរដល់ អង្គភាពកងការពារព្រំដែនលេខ៥០៣ ដែលបានដឹកនាំអង្គភាព មានការរីកចម្រើន និង ទទួលលទ្ធផលផ្លែផ្កាគួរជាទីមោទនៈ និងទទួលបានការកោតសរសើរពីថ្នាក់ដឹកនាំគ្រប់ជាន់ថ្នាក់។

មេបញ្ជាការរង មេបញ្ជាការទិសទី១ បន្ទាយមានជ័យ បានបន្តថា លទ្ធផលដែលអង្គភាពទទួលបាន គឺពិតជាការរួមចំណែកពី នាយទាហាន នាយទាហានរង និងពលទាហានទាំងអស់ ដែលបានចូលរួមគិត ចូលរួមធ្វើ និងទទួលខុសត្រូវខ្ពស់ ដោយឈរលើផែនការការងារ របស់យោធភូមិភាគទី៥ ធ្វើឱ្យទីបញ្ជាការ ធានាបានគ្រប់ភារកិច្ចដែលថ្នាក់លើប្រគល់ជូន ដូចជាការងារហ្វឹកហ្វឺន ប្រមូលផ្តុំគ្រប់គ្រងកម្លាំង ជំរុញការងារបង្កបង្កើនផល ចិញ្ចឹមសត្វ ធានាជីវភាពកងទ័ព ហើយបានបញ្ជូនកម្លាំងចុះប្រតិបត្តិការជួយសង្រ្គោះប្រជាពលរដ្ឋ រងគ្រោះដោយធម្មជាតិ គ្រោះទឹកជំនន់ ខ្យល់កន្រ្តាក់ ជួយកសាង ជួសជុលលំនៅដ្ឋាន ពិសេសការងារការពារបង្គោលសីមា ការពារខ្សែបន្ទាត់ព្រំដែនកុំឱ្យបាត់បង់សូមបីមួយមីលីម៉ែត្រ។

នៅក្នុងឱកាសនេះ អធិបតី បានអញ្ជើញ ជូនប័ណ្ណសរសើរ លិខិតសរសើរ ដល់នាយទាហាន នាយទាហានរង ដែលមានស្នាដៃល្អឆ្នើម ព្រមទាំងបានប្រគល់ថវិកា ចំនួន ១.០០០.០០០រៀល ជូនទីបញ្ជាការ កងការពារព្រំដែន៥០៣ ផងដែរ៕