ស្ទឹងត្រែង៖កម្លាំងនគរបាលអន្តោប្រវេសន៍ច្រកទ្វារព្រំដែនអន្តរជាតិត្រពាំងក្រៀល កម្ពុជា&ឡាវ ឃាត់ខ្លួនជនជាតិវៀតណាមចំនួន០២នាក់ នៅព្រឹកថ្ងៃទី០៤ ខែកញ្ញា ឆ្នាំ២០២៤ ខណៈត្រួតពិនិត្យលើរថយន្ត ដឹកអ្នកដំណើរ ពីប្រទេសឡាវចូល មកប្រទេសកម្ពុជា តាមច្រកទ្វារព្រំដែនអន្តរជាតិត្រពាំងក្រៀល ប្រទះឃើញម្សៅពណ៌សថ្លា និងថ្នាំគ្រាប់រាងមូលសំប៉ែតមួយចំនួន។ យោងតាមប្រភពពីមន្ត្រីនគរបាលអន្តោប្រវេសន៍ប្រចាំច្រកគេអន្តរជាតិក្រពាំងក្រៀល បានឲ្យដឹងថា កាលពីព្រឹកថ្ងៃទី៤ ខែកញ្ញា ឆ្នាំ២០២៤ មានរថយន្តក្រុងចំណុះ ៤៥ កៅអី ពាក់ស្លាកលេខឡាវ ៧៩៧៩ដឹកអ្នកដំណើរ ពីប្រទេសឡាវចូល មកប្រទេសកម្ពុជាក្រោយពីធ្វើការត្រួតពិនិត្យ ត្រូវបានរកឃើញមានផ្ទុកម្សៅពណ៌សថ្លា និងថ្នាំគ្រាប់មួយចំនួន នៅក្រោមកៅអីអង្គុយផ្នែកខាងក្រោយ រួមមាន ចំនួន២៧ដុំ(ធំៗ) ជាប្រភេទពណ៌សថ្លា សង្ស័យជាសារធាតុញៀន និងប្រភេទថ្នាំគ្រាប់ពណ៌បៃតង (សង្ស័យជាប្រភេទថ្នាំគ្រវី), ១០ដុំ(ធំៗ) ជាប្រភេទម្សៅសង្ស័យ ជាសារធាតុញៀន ប្រភេទហេរ៉ូអ៊ីន, គ្រាប់ក្រហមតូចៗ ៤៦៥គ្រាប់ សង្ស័យជាសារធាតុញៀនប្រភេទថ្នាំយ៉ាម៉ា និងពណ៌សថ្លា ១កញ្ចប់តូច។ ក្នុងការត្រួតពិនិត្យនេះដែរ ក៏បានឃាត់ខ្លួនជនជាតិវៀតណាម ០២នាក់ផងដែរ។ ដោយមានការសហការជាមួយកម្លាំងសមត្ថកិច្ចការិយាល័យទំនាក់ទំនងព្រំដែន (BLO) និងសមត្ថកិច្ចមូលដ្ឋានដែលពាក់ព័ន្ធ ដើម្បីសហការត្រួតពិនិត្យបន្ថែម និងបានបញ្ជូនបន្តទៅឲ្យស្នងការដ្ឋាននគរបាលខេត្តស្ទឹងត្រែង អនុវត្តនីតិវិធីបន្ត។