បន្ទាយមានជ័យ: នៅរសៀលថ្ងៃទី ២៧ ខែ តុលា ឆ្នាំ២០២២ លោកឧត្តមសេនីយ៍ទោ សិទ្ធិ ឡោះ ស្នងការនគរបាលខេត្តបន្ទាយមានជ័យ និងសហការី បានអញ្ជើញចូលរួមពិធីបុណ្យសពលោកវរសេនីយ័ត្រី គីម ឌី អតីតជាមន្ត្រីនគរបាលចូលនិវត្តន៍បម្រើការងារនៅខេត្តឧត្តរមានជ័យ បានទទួលមរណ:ភាពដោយរោគាពាធ ស្ថិតក្នុងភូមិអូរអំបិល សង្កាត់អូរអំបិល ក្រុងសិរីសោភ័ណ ខេត្តបន្ទាយមានជ័យ ។

គួរបញ្ជាក់ផងដែរ លោកវរសេនីយ៍ត្រី គីម ឌី បានទទួលមរណភាពដោយរោគាពាធ ក្នុងជន្មាយុ ៦១ ឆ្នាំ នាថ្ងៃទី ២៧ ខែ តុលា ឆ្នាំ ២០២២ និងកំពុងតំកល់ធ្វើបុណ្យតាមប្រពៃណីនៅគេហដ្ឋាននៃសព ។

ទន្ទឹមគ្នានោះលោកឧត្តមសេនីយ៍ទោ សិទ្ធិ ឡោះ បាននាំយកថវិកា ១,០០០,០០០ រៀល (មួយលានរៀល) អង្ករ ០២ការ៉ុង (១០០kg) ទឹកបរិសុទ្ធកម្ពុជា ១០កេស ទឹកក្រូច ៥កេស ដើម្បីចូលរួមរំលែកទុក្ខដល់ក្រុមគ្រួសារនៃគ្រួសារសព។

ក្នុងឱកាសដ៏ក្រៀមក្រំនេះដែរ លោកឧត្តមសេនីយ៍ទោ សិទ្ធិ ឡោះ បានសម្តែងនូវការចូលរួមមរណៈទុក្ខ និងសោកស្តាយយ៉ាងក្រៃលែងជាមួយក្រុមគ្រួសារនៃសព ចំពោះការបាត់បង់ស្វាមី ឪពុក ជីតា ជាទីស្រឡាញ់និងមានព្រហ្មវិធម៌ចំពោះភរិយា កូន និងចៅៗកន្លងមក ។

ក្រុមគ្រួសារនៃសព ក៏បានគោរពថ្លែងអំណរគុណ ដល់លោកឧត្តមសេនីយ៍ទោ ស្នងការ និងសហការី ដែលបានគិតគូរនិងយកចិត្តទុកដាក់ ដល់ក្រុមគ្រួសារនគរបាលដែលកំពុងជួបការលំបាក។ ក្រុមគ្រួសារសព ក៏បានជូនពរដល់ថ្នាក់ដឹកនាំទាំងអស់សូមជួបប្រទះតែពុទ្ធពរទាំង៤ប្រការគឺ អាយុ វណ្ណ: សុខ: ពល: កុំបីឃ្លៀងឃ្លាតឡើយ៕