"

កោះកុង÷ នៅថ្ងៃចន្ទ ១១ កើត ខែផល្គុន ឆ្នាំជូត ទោស័ក ព.ស ២៥៦៤ ត្រូវនឹងថ្ងៃទី២២ ខែកុម្ភ: ឆ្នាំ២០២១ លោក ទូ សាវុធ អភិ បាលរង នៃគណៈអភិបាលខេត្តកោះកុង បានអញ្ជើញជាអធិបតី ក្នុងពិធីបើកវគ្គបណ្តុះបណ្តាល ស្តីពីការធ្វើយុទ្ធនាការចាក់វ៉ាក់ សាំងការការពារកូវីដ-១៩ ជូនមន្ត្រីសុខាភិបាល និងកងកម្លាំងនគរ បាលខេត្តកោះកុង នៅសាលប្រជុំមន្ទីរសុខាភិបាល ។

ក្នុងឱកាសនោះដែរ លោក វេជ្ជ: បណ្ឌិត ទៅ មុឹង ប្រធានមន្ទីរសុខាភិបាល បានពន្យល់ដល់មន្ត្រីបុគ្គលិកសុខាភិបាល យល់អំពីរបៀបចាក់វ៉ាក់សាំងជូនមន្ត្រីបុគ្គលិកសុខាភិបាល និងកម្លាំងនគរបាល ដើម្បីឱ្យការចាក់វ៉ាក់ សាំងនេះស្របទៅនឹងគោល ការណ៍ណែនាំនានា របស់ក្រសួងសុខាភិបាល ។

លោកវេជ្ជ:បណ្ឌិត ទៅ មុឹង បញ្ជាក់ថា វ៉ាក់សាំងដែលត្រូវចាក់មានចំនួន៩០០នាក់ ហើយការ ចាក់វ៉ាក់សាំងនេះត្រូវមានទីតាំង មានបន្ទប់សង្គ្រោះនៅក្បែហ្នឹង ហើយវ៉ាក់សាំងដែលត្រូវចាក់ ចាប់ពីអាយុ ១៨ ឆ្នាំ ដល់ អាយុ ៥៩ឆ្នាំ ។

នាឱកាសនោះដែរ លោក ទូ សាវុធ អភិបាលរងខេត្ត បានលើក ឡើងថា សម្រាប់ខេត្តកោះកុងមានទីតាំងសម្រាប់ចាក់វ៉ាក់សាំងកូវីដ-១៩ ចំនួន២ទីតាំង គឺនៅមន្ទីរពេទ្យខេត្តកោះកុង និងមន្ទីរពេទ្យបង្អែកស្រែអំបិល ។ យើងទាំង អស់គ្នាបានដឹងហើយថា វ៉ាក់ សាំងនេះ ជាជំនួយពីប្រទេសចិន ហើយថ្មីៗបានចាក់ជូនកម្លាំងកងរាជអាវុធហត្ថ និងកម្លាំងនគរបាលការពារព្រំដែន ។ ជាជំហានបន្តនេះ ត្រូវចាក់ជូនបុគ្គ លិកសុខាភិបាល និងកម្លាំងនគរបាល ដើម្បីឱ្យការចាក់វ៉ាក់សាំងសមស្របទៅនឹងគោលការណ៍ណែនាំនានា សូមបងប្អូនជាមន្រ្តីជំនាញយកចិត្តទុកដាក់ឱ្យបានខ្ពស់បំផុត ក្នុងការសិក្សានាពេលនេះ ៕ ដោយ សុគន្ធី