(ខេត្តរតនគិរី):ព្រឹកថ្ងៃទី១១ ខែតុលា ឆ្នាំ២០២១ សមាគមមូលនិធីអភិរក្សដំរីអៃរាវត្តាបានរៀបចំការពិនិត្យសុខភាពដំរីទាំង៣ក្បាលនៅក្នុងខេត្តរតនគិរី ដែលរស់នៅក្នុងសហគមន៍កាទៀង ស្ថិតក្នុងសង្កាត់កាចាញ ក្រុងបានលុងខេត្តរតនគិរី។ ការពិនិត្យសុខភាពនេះធ្វើឡើងនៅក្នុងតំបន់អភិរក្សសត្វដំរីអៃរាវត្តា និងបានធ្វើការពិនិត្យផ្ទាល់ដោយក្រុមគ្រូពេទ្យជំនាញ រួមមានលោកស្រី (Virginie Scanga) អ្នកជំនាញពេទ្យសត្វដំរីនិងលោក(Dan Koehl) អ្នកប្រឹក្សាជំនាញលើដំរីព្រមទាំងមានការចូលរួមពី លោកស្រី ខៃ ចិន្តា ប្រធានសមាគមមូលនិធីអភិរក្សដំរីអៃរាវត្តា និងក្រុមការងារផងដែរ។
លោកស្រី (Virginie Scanga) ជំនាញពេទ្យសត្វ បានលើកឡើងថា លោកស្រីបានសង្កេតឃើញ ដំរីញីដែលមានឈ្មោះអ៊ីកែវ មានពោះបោងប្លែកខុសពីដំរីធម្មតា ចំពោះដើមទ្រូងដំរីញីមួយក្បាលនេះ គឺមានលក្ខណៈធំជាងប្រក្រតីផងដែរ ដែលជាសញ្ញាបញ្ជាក់ថាដំរីញីមួយនេះអាចនឹងកំពុងមានផ្ទៃពោះ។ លោកស្រីបន្ថែមថាដំរីទូទៅមានផ្ទៃពោះចន្លោះពីអាយុ ១០ឆ្នាំទៅ២០ឆ្នាំ ប៉ុន្ដែដំរីញី (អ៊ីកែវ) គឺមានអាយុដល់ទៅ ៣៨ឆ្នាំទៅហើយ ដូច្នេះដើម្បីជាក់ច្បាស់លោកស្រី និងក្រុមការងារបានបូមឈាម អ៊ីកែវ យកទៅពិនិត្យតាមបែបវិទ្យាសាស្រ្ដនៅមន្ទីរពិសោធន៍ភ្នំពេញ ដើម្បីដឹងលទ្ធផលថាតើដំរីញីនេះ ពិតជាមានកូនប្រាកដឬទេ។ ការបូមឈាមនេះផងដែរ គឺធ្វើឡើងសម្រាប់ដំរីទាំង៣ក្បាលតែម្ដង ដែលក្នុងនោះមានញីចំនួន១ក្បាល ហើយមន្ទីរពិសោធន៍នឹងធ្បើតេស្ដដើម្បីអោយដឹងថាដំរីទាំង៣ក្បាលមានជំងឺប្រចាំកាយឬអត់ក៍អត់។
លោកស្រី ខៃ ចិន្តា ប្រធានសមាគមមូលនិធីអភិរក្សដំរីអៃរាវត្តា និងក្រុមការងារ បានបង្ហាញអារម្មណ៍សប្បាយរីករាយ និងថ្លែងអំណរគុណដល់ក្រុមគ្រូពេទ្យជំនាញ ដែលបានមកពិនិត្យសុខភាពដល់សត្វដំរីទាំង៣ក្បាលក៏ដូចជាបង្ហាត់បង្ហាញនូវក្បួនមើលថែសត្វដំរីដល់ក្រុមការងារ។ លោកស្រីបញ្ជាក់ថា ក្នុងសមាគមមូលនិធីអភិរក្សដំរីអៃរាវត្តាមានដំរីចំនួនបីក្បាល ក្នុងនោះ ដំរីញីមានឈ្មោះ(អ៊ីកែវ) ឯចំណែកដំរីឈ្មោលពីរក្បាលនោញមានឈ្មោះ បុកវ៉ា និងខាំសែន។ដោយនាគមាស