ប្រទេសថៃ: កម្លាំងយោធាថៃក្នុងកងរយលេខ១២សហការជាមួយតម្រួតព្រំដែនលេខ៤ធ្វើការឃាត់ខ្លួន
ជនជាតិថៃចំនួន៧នាក់ដែលខំធ្វើដំណើរមកពីបណ្តាខេត្តមួយចំនួនក្នុងប្រទេសថៃ ខណ:ដែលពួកគេកំពុងក្រាបក្នុងរថយន្ត ដើម្បីត្រៀមឆ្លងដែនចូលទៅធ្វើការនៅក្នុងប្រទេសកម្ពុជា។ការឃាត់ខ្លួនជនជាតិថៃទាំង៧នាក់នេះគឺបានធ្វើឡើងនៅវេលាម៉ោង៣,៣០នាទីទៀបភ្លឺ ថ្ងៃទី ១១ ខែតុលា ឆ្នាំ២០២១ នៅពេលដែលកម្លាំងសមត្ថកិច្ចថៃកំពុងធ្វើការល្បាតតាមខ្សែបន្ទាត់ព្រំដែន ក៏បានប្រទះឃើញរថយន្តមួយគ្រឿង ម៉ាករ៉ូលេត ព៌ណខ្មៅ ពាក់ស្លាកលេខ បាងកក ៥៧១៨ ដែលបានចតស្ងៀម ត្រង់ចំណុចក្បែបន្ទាត់ព្រំដែន ក្នុងឃុំគោកខ្យូង ស្រុកគោកខ្យូង ខេត្តស្រះកែវ (ដោយអ្នកបើកបររត់គេចខ្លួន)។ក្រោយពីកម្លាំងចូលទៅពិនិត្យគឺឃើញមានជនជាតិថៃចំនួន ៧ នាក់ ស្រី៤នាក់ ដែលខ្លះអង្គុយក្នុងរថយន្ត និងខ្លះទៀតបានដេកក្រាបនៅក្នុងឃ្លុបខាងក្រោយរថយន្ត ។ ក្រោយពីកម្លាំងបានសាកសួររួចមក ជនជាតិថៃទាំងអស់ បានសារភាពថា ពួកគេទាំងអស់ គឺមកពីខេត្តស្រះកែវចំនួន ២ នាក់  ខេត្តណុនថ:បុរី ១ នាក់ ខេត្តខនកែន ១ នាក់ ខេត្តអ៊ូប៊ុនរ៉ាតថានី ១ នាក់ និងទីក្រុងបាងកក ចំនួន ២ នាក់ ដោយមានបំណងឆ្លងដែនទៅធ្វើការក្នុងកាសុីណូ អនឡាញ នាក្រុងប៉ោយប៉ែត ដោយនៅទីនោះឮថាបានប្រាក់ខែខ្ពស់ តែនៅពេលពួកគេមកដល់ក្បែព្រំដែន តែក៏ត្រូវចាប់ខ្លួនតែម្តង ។បច្ចុប្បន្នក្រោយពេលឃាត់ខ្លួន និងក្រោយពេលដែលក្រុមគ្រូពេទ្យបានពិនិត្យសុខភាពរួចមក ពួកគេទាំងអស់ត្រូវបានបញ្ជូនទៅកាន់អធិការដ្ឋានតម្រួត ស្រុកគោកខ្យូង ដើម្បីអនុវត្ន៍តាមវិធានការច្បាប់៕