តំណាងរាស្រ្តមណ្ឌលរតនគិរី អញ្ជើញចុះសួរសុខទុក្ខភ្នាក់ងារទូរទស្សន៍បាយ័នប្រចាំខេត្តរតនគិរីដែលកំពុងសម្រាកព្យាបាលមន្ទីរពេទ្យបង្អែកខេត្ត

នៅព្រឹកថ្ងៃអង្គារ ១៣រោជ ខែពិសាខ ឆ្នាំជូតទោស័ក ពស២៥៦៤ ដែលត្រូវនឹងថ្ងៃទី១៩ ខែឧសភា ឆ្នាំ២០២០ ឯកឧត្តម ប៊ូ ឡាំ អ្នក តំណាងរាស្រ្តមណ្ឌលរតនគិរី អមដំណើរដោយប្រធានអនុប្រធានមន្ទីរព័ត៌មាន និងមន្ត្រីអ្នកមុខអ្នកការមួយចំនួន បានអញ្ជើញសាកសួរសុខទុក្ខលោកជៀប សម្បត្តិ ជាភ្នាក់ងារទូរទស្សន៍បាយ័នប្រចាំខេត្តរតនគិរីដែលកំពុងសម្រាកព្យាបាលជំងឺនៅមន្ទីរពេទ្យបង្អែកខេត្តរតនគិរី។

ក្នុងឱកាសនោះឯកឧត្តម ប៊ូ ឡាំ បានជូនពរលោកជៀប​ សម្បត្តិ​ និងផ្តាំផ្ញើឲ្យយកចិត្តទុកដាក់ក្នុងការថែរក្សាសុខភាពខ្លួន និងជូនពរឲ្យឆាប់ជាសះស្បើយពីជម្ងឺក្នុងពេលឆាប់ៗនេះ។

ជាមួយគ្នានេះផងដែរ ឯកឧត្តម អ្នកតំណាងរាស្រ្ត ក៏បានផ្តល់ជូនជាថវិកាផ្ទាល់ខ្លួនមួយចំនួនដល់លោក ជៀប សម្បត្តិ ដែលកំពុងសម្រាកព្យាបាលជម្ងឺនៅមន្ទីរពេទ្យខេត្តជាការរួមចំណែកសម្រួលការខ្វះខាតផងដែរ។​

លោកជៀប​ សម្បត្តិបានគោរពថ្លែងអំណរគុណយ៉ាងជ្រាលជ្រៅចំពោះទឹកចិត្តរបស់ឯកឧត្តម​ ប៊ូ​ ឡាំ​ ដែលមានការអាណិតស្រលាញ់ចំពោះរូបលោកក៏ដូចជាអ្នកសារព័ត៌មានដ៏ទៃទៀត​ និងសូមជូនពរអោយឯកឧត្តមមានកម្លាំងពលំមាំមួនប្រាជ្ញាវៀងវៃដើម្បី​បម្រើជាតិមាតុភូមិ​ និងប្រជាជនក្នុងខេតរតនគិរីឆ្ពោះទៅការរីកចម្រើនបន្តទៀត៕