ទាហានឈុតខ្មៅថៃចាប់ខ្លួនពលករខ្មែរ ១៤នាក់ពេលដែលពួកគេបម្រុងចូលទៅធ្វើការនៅខេត្តឆ:ឈើងសៅ និងខេត្តសមុទ្រប្រាកាន
ប្រទេសថៃ,ខេត្តស្រះកែវ:
ពលករខ្មែរចំនួន ១៤នាក់ ត្រូវបានក្រុមទាហានឈុតខ្មៅថៃ ក្នុកងរយលេខ១២ ចាប់ខ្លួន ខណ:ដែលពួកគេលបឆ្លងដែនដោយខុសច្បាប់ ដើម្បីចូលទឹកដីថៃរកការងារធ្វើ នៅក្នុងខេត្តចំនួនពីរ នាទឹកដីថៃ។ការឃាត់ខ្លួននេះបានធ្វើឡើងកាលពីព្រឹកថ្ងៃទី ២៣ ខែកញ្ញា ឆ្នាំ២០២១ វេលាម៉ោង ១ រសៀល ត្រង់ចំណុចភូមិប៉ារ៉ៃម៉ៃ ក្នុងឃុំប៉ារ៉ៃ ស្រុកអារញ្ញប្រាថេត ខេត្តស្រះកែវ ប្រទេសថៃ ។នៅមុនពេលឃាត់ខ្លួនគឺមានពលករខ្មែរចំនួន១៤ នាក់ បានលបឆ្លងព្រំដែនចូលទៅក្នុងទឹកដីថៃ ដោយនាំគ្នាដើរកាត់តាមចម្ការអំពៅ ស្របពេលដែលកម្លាំងទាហានឈុតខ្មៅថៃ កំពុងល្បាតក៏បានស្ទាក់ចាប់ ក្នុងនោះប្រុស ៤ នាក់ ស្រី ៥ នាក់ ក្មេងប្រុស ៣ នាក់ និងក្មេងស្រី ២ នាក់ ។ក្រោយការចាប់ខ្លួនពលករខ្មែរបានសារភាពថា ពួកគេទាំងអស់គ្នាមានបំណងចូលទៅរកការងារធ្វើ ជាកម្មករសំណង់ ដោយខ្លះចង់ទៅខេត្ត ឆ:ឈើងសៅ និងខ្លះទៀត ចង់ទៅធ្វើនៅខេត្ត សមុទ្រប្រាកាន ។ក្រោយពេលឃាត់ខ្លួន ក្រុមយោធាថៃបានត្រួតពិនិត្យសុខភាពពួកគេទាំងអស់ ដើម្បីការពារនៅក្នុងដំណាក់កាល នៃជំងឺកូវីដ-១៩ ដែលកំពុងរាតត្បាត និងបានបញ្ជូនទៅអោយអធិការដ្ឋានតម្រួត ស្រុកអារញ្ញប្រាថេត ដើម្បីអនុវត្តតាមនីតិវិធី ៕