ខេត្តរតនគិរី÷ ប្រធានសាខាធនាគារABAបានស្លាប់បាត់បង់ជីវិត បន្ទាប់ពីបើករថយន្តធ្លាក់ផ្លូវនៅវេលាម៉ោង២១និង១០នាទី កាលពីថ្ងៃទី១០ ខែតុលា ឆ្នាំ២០២១ ត្រង់ចំណុចភូមិជ្រី សង្កាត់យក្ខឡោម ក្រុងបានលុង។

យោងតាមរបាយការណ៍ពីនគរបាលបានឲ្យដឹងថា ជនរងគ្រោះឈ្មោះ សយ សារុំ ភេទប្រុស អាយុ៤៤ឆ្នាំជនជាតិខ្មែរ មានទីលំនៅស្នាក់នៅផ្ទះជួល ស្ថិតនៅក្នុងភូមិជ្រី សង្កាត់យក្ខឡោម ក្រុងបានលុង មុខរបរ នាយកសាខាធនាគារABA បេីកបររថយន្តម៉ាកLEXUS ពណ៌ស ពាក់ស្លាកលេខភ្នំពេញ2S-9873។

របាយការណ៍បានបញ្ជាក់ថា មូលហេតុជនរងគ្រោះមានជំងឺគាំងបេះដូងបើករថយន្តធ្លាក់ផ្លូវនៅចំណុចភូមិ-សង្កាត់ខាងលើ។ ហើយជនរងគ្រោះបានស្លាប់បន្ទាប់ពីដឹកបញ្ជូនទៅដល់មន្ទីរពេទ្យបង្អែកខេត្តរតនគិរី។

បច្ចុប្បន្នសាកសពត្រូវបានសមត្ថកិច្ចប្រគល់ទៅឲ្យក្រុមគ្រួសារយកទៅធ្វើបុណ្យតាមប្រពៃណីនៅគេហដ្ឋានឯស្រុកកំណើត៕